Khinkhing

Sanginn a Kawlgamdial kikhai athak hi dinghi. Huih lak ah tua dialkhai huangin leng satsat. Tulaitak nang e, nasam huih na mutsak zilzial diammaw Cingkaang.

            Simsing apaak a, Zosing apaak zong in kei ading thupi kei. Thang dung a, abeikhin ngeisokte ken lunggulh nawn keng. Sialtaang tui a lim lai hiam?  Bangbang hitaleh natawlciang na dawn zel oo maw.

           A lunghimawhbaih kei leh alung nuamzoden nang I kimuhcil na mangngilh nai hia? Sang apna sum hongsang dingnu aciah manding lau a atai kei, sangap ding ong pai hithiat pan nang I ki phul khak. Tualaitak  nalai tung ah min akigelh pen kagalmuh lam na thei nai hia?

            Kiakpono khat hitaleh atawpna pen in hanciam in kensung kakiat loh nang in amanciplai dingpa hing. Mittaw sialkhaulet nong cih sang asialkhau’ manawhna naetsak phot ve maw. Galphual maw Paakphual maw?

           Major kibang eitegel I roll lah kizomlai.A maigumden kei pa kiang nong thugen naphawk lai hia”Nakimuh mikhatpeuh tungah second 7 hunpiak ding haksalo ding hi. Tuasung in na hihtheihtawp in maitaiden lel in”nong cih e.”lungdam ei! Cingkaang “ kongcih leh “Nang ka Zomin koi cih theih ci-a nong dotdot e, naphawk lai hia? Tunbel theita niteh maw.Mite it leh maingapding bel lunggulh mah ing .Ahih hang nong thugen kong ngaihnopna lungsim hi zaw ei. Na maimial ding ka lauhman a nalaitei manloh te kong teisakdet, banghang ahitam cih na ngaihsunngei na Cingkaang.

       Kei dinmunpan ama ading ka septheihtawp ahoih pen in ka sem zo hi. Oh! Ni-aw, Kha-aw, Aksi-aw, Khalhuih-aw ,Guahtui-aw, Daitui-aw, keitang in amah nana vilsak den vo maw.

         Na suahni in nang ading Zokhibah kongpiakhun naphawk lai diam maw . Tu bangmah in huihnung hiauhiau .Huih ommawh pawlkhat in nasam te lenpih sawm zilzial.  Singteh te lam zihziah . I lawm ten practical bawl ngeingai.Sanginnkiu a, tutphah khattungah eitegel khathum kimang ding zawl thu ki gen.

           “I ngaihte tawh omleng khathum pen naithum bang . Mei-am tung tuleng minutethum pen naithum bang.” ( Estein ‘Relatively theory). Ka nuntak hunsung ah naithum abang hun zangkhin ing . Aw..Topa! tuabang hun hongpiapen ading thukhat ngetsak nuam ing“ A khansung in kuama mai-en in om khakei ta hen oo”

          Cingkaang  Zokhibah sang khamkhibah na ok nop zawk nang khialkei cie. Melmuh tonglel sang phone sung a ,tong kisan nop nasak zawk mah ding hi ei. Na gei alaikung laidal leh thungipsia kuah pa sang na gal a laptop tawh nasempa na paktat zawk khial kei cie. Buangnai khedap  kop tungtuang pa sang motorcycle tuang pa na telzawk khial ong sa aom leh ong gen in.Tua te nitak  “an” ding “itna” honkhat puak nuam lua ing.

           A nunung gal bansat kici hi lo hiam ? Kei ka hih leh khe dap tawsia tawh hing ei. Na pai khol vo. Tua Thuamvumdawn naci uh zong . Takkheh!!.. ong tung kaltang veve ding hing ei. Tuatengah ni atum baih leh hi bek ding hi.A ziakai kuamah om lo ding hi.

         Nang kiang pan thelnah leng kangah tawpna pen tuma kha lang lai hi lo a hia. Mopawi sapna ahih lam ka-et lohhang tel mah mah ing . Tua lai-ip en keng . Balkek keng . Meiah hal keng . Lah paingam kei ing. Cingkaang aw. nang kiang pan ahih nakleh …hih ka singkuang sungah aom nang khutma , nangthu , nangvang tawh akipelh lo nate lak ah tua lai-ip atawpna pen hi ei. Tuma . tuhun leh hongpai laidinghun te ah nang ading hi tawntung ding hi.Kuamah in hih singkuang ahon theih loh nang ka lungtang tawh na kalh cip ning ei . Ahihhang Cingkaang tua lungtang zannim lua in akipkei khak leh ong mai sak oo maw .

           Vaphual  cihtak lam akan ten ni bangzah hun ana bei hiam ? Ngal hapaak sa  atumkik leh atumkik loh  a encik pen kua ahihiam? Zawlthu kal ah sial ki samkei . Sumsan tang khat hi leh kicing lua ta hi. Ki cing lua ta hi. Ki cing lua ta hi . Cingkaang aw. Nahtang laingek ci kei oo, agap na ngawn anelo pa hi ing ei.

             Cingkaang na mopawi kong pailoh lawm ten ong phin phin . Ka mit heh lua hiam, ka mittang in cilphih suk  hi ven . Amau dai lian . Atam zaw te adaih leh atawm zaw kei ka daih akul ding hi mah hi mate. Tua nibel dai dide. Leitung bel kipei veve hi leh ki lawm . Lunghimawh kei oo Cingkaang kamaitai den in cie,ka thungip kalnih khatvei sawp ding na mangilh nawn kei ning ei. Ka puanngawng khep ding na mangilh kei ning ei. I tutphah nuai ah  bel na mohhawng te pai nuam in na zong kha zel ing ei.

             Meiteigun in min bangzah nei ken thei kei ing. Sangak in akpi anek ding kua hilh hiam thei kei ing.  Kum ki zomli te lak ah behiang kum lo a dang te bang be in kilo hiam thei keng . Leikha in phulum phul nang in apetlet sak hing ci-in kua tung ah hong gen kha ahiam? Vasi in daingo kham kei leh ham ken teh aci ngam i om dia? Men cim lak ah aom hi leng ka khut in dal zotuan ken teh ci-a, akhut zep hithiat ding a om diam?Kua in vandumpi akhut tawh liah zawh sawm hiam?

              Cing kaang aw …. Kei tun sang nakah lai ing.Dialkhai nung a sunnizang en zolo in ka khut tawh ka mit adal hing . Huih zong nung hiau hiau lai mah ei. Hih lei tung ah husan khat tawh a ki zui khawm khitui mal khat kua in thudon man ding ahi hiam.

               (na muh zia, na comments ki ngak lah mahmah hi.)

                                             horizon@freelancer group